Borgir
Gaman er að leika sér í grjóthnullungunum í Borgarholti.
Fyrir þúsundum ára, var sjór allt í kringum hæðina. Hann sópaði litlum steinum í burtu en pússaði þá stóru. Það er kraftur í hafinu.
Álfhóll
Álfhóll – (SH).
Grjótið í Álfhóli er fallegt og gaman að leika sér í því. Fyrir mjög, MJÖG löngu síðan var hér jökull sem pússaði grjótið.
Ætli álfur búi í hólnum?
Hádegishólar
Við Hádegishóla – (SH).
Sjáið þið rendurnar á þessum klöppum?
Þær eru eftir jökulinn.
Víghólar
Jökullinn hafði mikil áhrif á landið sem undir honum var. Þessi mynd er frá Víghólum. Grjótið er slétt og minnir stundum á hvali á sundi.
Klappir á Víghólum – (SH).
Grjót – klappir – steinar – björg – klettar – hnullungar
Grjót – klöpp – steinn – bjarg – klettur – hnullungur
Líf
Blettirnir á grjótinu eru lífverur sem eru kallaðar fléttur. Mikið geta þær verið fallegar á litinn.
Inn á milli steinanna vaxa margar tegundir af plöntum. Flestum finnst mest gaman að skoða litrík blóm. Þar vaxa líka græn grös og mosar.
Steindepli líður vel þar sem mikið er um grjót. Skoðið myndir af honum og hlustið á hljóð hans á Fuglavefnum.
Steindepill – (JBH).
Hafið þið séð könguló í köngulóarvef?
Þær gætu verið að spinna, veiða flugu, gera við vefinn, bíða eða kannski dansa.
Algengt er að sjá köngulær í klettum, sérstaklega ef mikið er um flugur. Köngulóin á myndinni er reyndar við ruslatunnu!
KENNARAR / FULLORÐNIR
Víða er grjót
Víða í Kópavogi er grjót, klettar og klappir. Hér er sérstaklega bent á Borgir, Víghóla, Álfhól og Hádegishóla.
Sjórinn átti þátt í að skapa sérkennilegt Borgarholtið, en ísaldarjökullinn pússaði grjótið á hinum stöðunum. Á grjótinu sjást för sem eru eftir þungan jökul. Jökullinn lagðist yfir mestallt Ísland, meðal annars Kópavog. Jökullinn hafði mikil áhrif á landið sem undir honum var. – Síðasta jökulskeið var fyrir ~10.000 árum.
Álfasögur
Minnt skal á flokk þjóðsagna um álfa. Einhverjar þeirra henta yngstu börnunum.
Gunnhildur og Glói er skemmtileg álfasaga eftir Guðrúnu Helgadóttur.
Á vettvangi
- Að príla / að stökkva á milli steina – feluleikur – búleikir.
- Að velja sinn stein, fara eitthvað annað og finna hann svo aftur!
- Skoða fléttur, mosa og gróður með hjálp stækkunarglers. Hægt að skoða gróður þótt ekki sé sumar.
- Skoða stóran klett og reyna að finna allar flétturnar á honum. Merkja við með krít. Telja merkin!
- Smádýralíf getur verið auðugt innan um grjótið.
- Safna og skoða með stækkunargleri alls konar pöddur og orma á yfirborði og í jarðvegi. (Sjá lista yfir áhöld.)