Garðar í Kópavogi eru margir og ólíkir. Sjáið fyrir ykkur einn í huganum. Lokið fyrst augunum.
Eru tré í garðinum? Eru blóm? Er gras? Er sandkassi? Er trampólín? Er þar ræktað grænmeti? Sjáið þið fugla? En pöddur?
Í görðum má rannsaka margt og bardúsa.
Hlíðargarður er ævintýralegur garður, næstum eins og hallargarður. Þið gætuð samið ævintýri.
Garðfuglar
Stundum er talað um garðfugla. Þá er átt við fugla sem oft sjást í görðum. Gaman er að lokka þá með korni, ávöxtum eða öðru góðgæti.
Pöddur og ormar
Við rekumst stundum á pöddur og orma í görðum.
Líklegir staðir eru í og ofan á moldinni eða undir einhverju, t.d. laufblöðum eða spýtu sem hefur gleymst. Svo eru flugur og fiðrildi fljúgandi um allt.
Leitið að pöddum og ormum.
Grænmeti
Hver sem er getur ræktað grænmeti. Hér er ungt kartöflugras.
KENNARAR / FULLORÐNIR
Hlíðargarðsævintýri
Hlíðargarður minnir á hallargarð! Teiknið höll sem gæti staðið við enda hans. Hvaða fólk á heima í höllinni? Ímyndið ykkur að allir í fjölskyldunni og þjónustufólkið fari út í garðinn að drekka kaffi og borða kökur. Þá gerist nokkuð og þið megið ákveða hvað það er og hvernig það endar. Í heimsókn í Hlíðargarð gætuð þið leikið viðburðinn.
Garðablóm
Skrautplöntur í görðum eru oft stórgerðar og plöntulíffæri greinileg, s.s. fræ, fræflar, frævur, krónublöð, bikarblöð, lauf o.s.frv. Kjörið að skoða.
Garðfuglar
Á vef Fuglaverndar eru leiðbeiningar um fóðrun garðfugla. Nemendur gætu smíðað fóðrunarhús eða komið upp öruggum stað til að fóðra fugla. Kettir eru jú oft á ferðinni.
Á vef Fuglaverndar má skoða hreiðurhús fyrir nokkrar ólíkar tegundir fugla.
Til að auka líkurnar á að fá fugla í garðinn okkar / skólalóðina þurfum við að fara hægt og hafa lágt.
Ræktun
Lærdómsríkt er að rækta skrautblóm og matjurtir.
Einfalt er að rækta kartöflur og þær þurfa ekki svo mikla umönnun – ekki einu sinni vökvun.
Einnig er auðvelt að rækta blaðsalat, radísur (fljótsprottnar) og gulrætur.
Skemmtilegt er að setja niður haustlauka og fylgjast með þeim blómstra að vori. Krókusar henta vel í grasflöt.
Í mörgum görðum (hugsanlega líka á skólalóðinni) eru berjarunnar sem lærdómsríkt er að sinna, tína berin, vinna úr og borða.
Pödduhús
Yngstu nemendurnir gætu haft gaman af að föndra hús fyrir pöddur. SJÁ.