Við sólarupprás í morgun blöstu við falleg glitský hátt á himni. Þau myndast þegar er mjög kalt og venjulega um hávetur. Litir glitskýja eru fallegir og skýin ljóma, enda böðuð í sólargeislum. Sumum finnst þau minna á perlur.
Glitský myndast í 15-30 km hæð og í þeim eru ískristallar. Kristallarnir í skýjunum beygja sólarljósið og þá sjáum við ólíka liti.
Veðurfræðingar hafa sagt að nokkrar líkur séu á að við sjáum aftur glitský á næstu dögum, eða þangað til fer að hlýna seinna í vikunni. Þið ættuð að fylgjast vel með.
