Aðeins ein tegund barrtrjáa er upprunaleg í náttúru Íslands. Hún heitir einir. Auðvelt er að muna það!
Hinar tegundirnar eru innfluttar og hafa verið ræktaðar hér og plantað víðs vegar. Algeng barrtré á Íslandi eru til dæmis sitkagreni, stafafura og lerki.
Barr er í grunninn laufblöð sem hafa ummyndast og orðið í laginu eins og nálar. Sumt barr er svo hvasst að það má auðveldlega stinga sig á því. Barr fellur ekki á haustin líkt og laufið, nema barr lerkisins.
Einir vex niður við jörð en þar sem aðstæður eru góðar getur hann myndað miklar breiður. Á eini myndast einiber sem ná fullum þroska á þremur árum.
Fyrir tíma skógræktar var einir notaður til að skreyta um jólin, já og sortulyng. Þá voru greinar klipptar og þeim komið fallega fyrir til dæmis á heimasmíðuðu jólatré, sbr. mynd hér til hliðar.
Jólatrén sem við notum núna á okkar dögum eru flest flutt inn frá útlöndum en einnig er stór hluti þeirra ræktaður á Íslandi.
- Er jólatré í skólanum ykkar eða við skólann ykkar?
- Hvaðan ætli það tré sé komið?
- Hvaða tegund er það?
- Hefur jólatréð í skólanum hlutverk? / Af hverju eru sett upp jólatré?
- Hvað er hengt á jólatré?
Á Vísindavefnum er meira sagt frá eini – LESA.
